இந்த நூற்றாண்டுத் தமிழகத்தின் மகத்தான சரித்திரநாயகன் நம் தலைவர் காமராஜ் ஆவார்.

காற்றினைப்போல் தூயவர்; இமயம்போல் உயர்ந்தவர்; கங்கையைப் போல் ஆழ்ந்த அறிவாளர்; அமைதியே உருவான காமராஜ். தம் தியாகத்தாலும், தொண்டாலும், எளிமையாலும் புதியதோர் சரித்திரம் படைத்த தூய்மையாளர் அவர். அவருடைய நாமம் சரித்திரப் பொன்னேட்டில் பதிவாகிப் பளபளக்கிறது.

அவருக்கு நண்பனும் ஒன்றுதான், பகைவனும் ஒன்றுதான். வானத்தில் எந்த நிறமாவது ஒட்டுகிறதா? இல்லையே! துதியும், பழியும் இவரை அசைத்ததில்லை. இரண்டையுமே சமமாக மதித்து, பற்றற்று, நாட்டுக்குத் தம் வாழ்நாளை அர்ப்பணித்த பண்பாளர் காமராஜ். அவர் அமரரானார். எனினும், வானமெங்கும் வாயு பரந்திருப்பது போலவே எல்லோருடைய இதயங்களிலும் அவர் வாழ்கிறார்.

மனித குலத்துக்கும், நாட்டுக்கும் அருந்தொண்டாற்றும் அருளாளர்கள் நம் நாட்டில் இடையிடையே தோன்றி வருவார்கள். அத்தகையோரின் வரிசையில் தாமும் ஒருவராக விளங்கியவர் காமராஜ். மழை பெய்தாலும் பெய்யாவிட்டாலும் கடல் என்றும் நிறைந் திருப்பது போல் மகிழ்வுக்கான நிகழ்ச்சிகள் நேர்ந்தாலும் நேராவிட்டாலும் கருமமே கண்ணாய் இருந்தவர் நம் கர்மவீரர் காமராஜ்.

நமது நாட்டின் அரசியலில் மிகமிக எளிமையாக, அமைதியாக, முன்னுதாரண மாகத் தொண்டாற்றி, முதல் அமைச்சர் பதவியைக்கூடத் தாமே துறந்த தூய்மை யாளர் அவர்.பாரத தியாகவீரர்கள் வரிசையில் முதலிடம் பெற்றவர் அவர்.